Indian Time - A Voice from the Eastern Door

(Tsiothohrekó:wa 23, 2019) Ahkwesáhshne – Ne 2016, ne Kioteróhon Kanakeráhtshera Onkwe'tà:ke Ronakia'tarò:ron tahonthró:ri 2019 ne Tsi Na'tekanakerahtsherátere Aóhsera Ne Thiionkwehonwehseraténion Raotiwenna'shón:'a (IYIL), rotirì:waien ahonteweièn:ton, taontahón:kerahkwe tánon tahonterihwarénia'te Thiionkwehonwehseraténion Raotiwén:na ohontsiakwé:kon. Ne rotirì:waien ahatiié:na ne onkwe'tà:ke, ohwísta tsi ratiié:nas (ratihwistaié:nas) tánon kakorahtsherakónhson ratikwatákwas, entsisewarihwahseronniánion tánon skén:nen tehatirihwáhshnie.

Ne U.N. ronttó:kas ne 40% neiehotíhewe 6,700 nikawén:nake rotíhthare ohontsiakwé:kon iótteron ahotiwennón:ti – thó:ha akwé:kon kí:ken Thiionkwehonwehseraténion owenna'shón:'a – tsi niionkwarihò:ten tánon ionkwaterien'tá:ron aoianerénhsera tsi nón:we niió:wen iótteron ne ahotiwennón:ti.

"Ahkwesáhshne Tká:ras rotitshénrion né:'e thonaten'nienténhston ne Tsiionkwehonwehserá:te ratiká:ratons, ne ionkwarì:waien ne taetewatáteni onkwewén:na, tsi niionkwarihò:ten tánon tsi nikionkwé:non tsi teionkwatohétston kí:ken né:'k ne entewatá:ti tsi niionkwarihò:ten. Ne aonhá:'a iorihowá:nen tsi ní:ioht tsi iakwáhsere né:'e teiakwaká:nere eniakwakaratónnion onkwakara'shón:'a ne onkwe'tà:ke niió:re, tánon akaién:take ne Kanien'kéha owén:na taiakwatáteni tsi nahò:ten kahiá:ton ne tsi tewatewennarenià:tha iohshon'onhákie," tahatá:ti Regan Jacobs, Ierihwakwatákwas/ Raotinékeri ne Ahkwesáhshne Tká:ras. "Iorihowá:nen wahón:nise tsi nontaiohtonhákie ne taiakwahsónteren onkwawén:na ionkwatoweien'tónkie ken'iehatiiéhrha ne Teká:neren Kanakeráhtshera Rotirihowanáhton né:'e ne Raotiianerénhsera Ne Thiionkwehonwehseraténion Onkwehshón:'a tánon ne 2030 Tsi Ní:ioht Tsi Rotiio'tákie Ne Ensaienawa'khónhake Enkarihwakwatákwen."

Roia'tatokénhti Regis Kanien'kehá:ka Onkwehón:we Roteríhonte Eric Thompson wahshakoié:nawa'se wa'tehshakóhshnie Ahkwesáhshne TV's Kiokierentáhkwen rotirihwaién:tahkwe nó:nen ne tewatewennarenià:tha kiokierénhton shahatíhsa. Roteríhonte Thompson taháhtka'we, "Nó:nen ne Onkwehón:we wahontenonhsón:ni ne Tewatewennarenià:tha, owén:na tánon tsi niionkwarihò:ten enhatiwén:narahste né:'e ohén:ton wahatí:ren, né:'e tenhontká:neren tánon enhatiwénnarahste ne Tewatewennarenia'thà:ke. Tsi ontá:kerahkwe tewaká:ratons wahonohrókhon tsi niionkwarihò:ten tsi nón:we niionkwahsa'ánion tánon ionkwarihwakwatákwen kwáh ken'ní:kon enhatíhsere né:'e wa'thontká:neren ne onkonkwe'ta'shón:'a raotiwén:na tánon tsi nikionkwé:non. Iakwaká:ratons tsi ní:ioht tsi tsionkwahkwísron – ia'taonsaiakwatéthare aonsaiakiónhnhete tsi niionkwarihò:ten – ón:wa wenhniseratákie."

Jacobs wa'ì:ron tsi orì:wa í:ienhre aiéhsere kí:ken iohseratákie aontaierihwakétsko oh ní:ioht ne onkwe'tà:ke kanenhraién:ton, tsi ní:ioht ne Roia'tatokénhti Regis Kanien'kehá:ka Onkwehón:we, nihotiié:ren tsi tontahón:kerahkwe aonsontónhnhe onkwawén:na onkwe'tà:ke nonkwá:ti. "Ahsén:nen nón:we niiákwe aiakwahiatonhserísa ne onkwehonwehnéha aká:rake akahiatòn:ke tánon akahiatonhseríson ne sénha taonterihwarenia'tónhake ne Kanien'kéha," wa'ì:ron. "Iotonhá:rake ne Kenhnikahá:wi ne Thiionkwehonwehseraténion aiekaratónhkhwake. Í:iah té:kehre sótsi é:so akthá:rakwe, né:'k tsi iákwehre aiakhihón:karon ne kiokierenhtáhkwen kwáh né:'e raotiwén:na tánon ronhrónkha tsi ionkwaná:taien ne aontahatihshwanón:na ki:ken iakwahtenkia'tá:ne."

Ne Kaianerenhserà:ke IYIL enwaterihwahtén:ti – konwá:iats "Thiionkwehonwehseraténion raotiwén:na orì:wa ne ensaienawa'khónhake ratikwatákwas, skén:nen enhatirihwahseronniánion tánon tenhshatitharónnion," Paris, France né:'e ne UN nón:we Awententa'ón'ke Tsiothóhrha 28, 2019, tánon Jacobs thó ieiakawenónhne.

Tsi onterihwahtén:ti, é:neken thonátte Kakoráhtshera aonkwe'ta'shón:'a tsi ionkwehonwehseraténon onkwehshón:'a, ronnonkwe'tí:ios onkwe'tà:ke, ronatoweiénston, ratiráhstha, ratirihwarò:roks tánon shonehiá:rons kanenhrakè:ron, Teká:neren Kanakeráhtshera kenkióhkwa kanenhrà:ke owén:na tekarennatihá:ton tánon tsi nón:we nihonthiatonhseratoweièn:tonhkhwa tánon kari'wahséhton tsi ronkia'tarohrókstha. Ne teká:neren kanakeráhtshera ronathiatonhseraweiénston, ohontsia'kékha tánon Tsi niionkwarihò:tens Raotiióhkwa (UNESCO) tahontáhsawen ne "Iohserátakie ne Thiionkwehonwehseraténion Raotiwenna'shón:'a ne Tsiothohrkó:wa Tekeníhaton 2nd, 2019.