Indian Time - A Voice from the Eastern Door

Iehiá:tons Robin Logan

Tsióhsera tsi náhe, Kentsià:ke Ahsén:nen Tsi Iontoweienstáhkhwa Rontoweiénstha tánon Kanien'kehá:ka Raotikióhkwa raononkwe'ta'shón:'a skáthne ratiià:tare tehotihthá:rahkwe ne Tá:wiht Sommerstein of Othorè:ke Kaná:taien Onkwe'tà:ke Tewatewennarenià:tha. Tá:wiht rahská:neks ahonthón:te'ne oh nahò:ten ne rontoweiénstha ahonnì:ron na'tekarì:wake tsi ní:ioht ne ka'nikonhríson tánon ronwatirihwénhtha, tánon tsi nihatiieránions tahatí:tsha tsi tsi nahò:ten teká:ronhwe. Rontoweiénstha wahonthrória'te roti'nikonhrahní:ron tis nahò:ten ronónha tehonatohetstánion tánon onterihó:wanahte tekahnontsiakhánion. Tá:wiht ó:ni wahakià:taren tsi

Ronatkenníson ne Kanien'kehá:ka Raotikióhkwa tsi nón:we ne rontoweiénstha ratirihwahseronniánions tá:we ne Onkwehón:we Raonenhnísera tehontenonhwará:tons, tsi niká:ien khia'teiohserá:ke ronterihwahtenkià:tha ne tsi iontoweienstáhkhwa. Rontoweiénstha wahonnì:ron thí:ken Onkwehón:we Awenhnísera kia'nikonhrí:io ahonwatirihónnien tsi niká:ien skáthne rontowénstha tánon tenhonteirhókwahte tsi nihotirihò:ten.

Tsi niió:re ontóhetste ne tehotirihokwáhtha tsi ronwanatkén:se skáthne ne NCPR, iakorihonnién:ni tánon shako'nikonhrá:wis ne Kanien'kehá:ka Raotikióhkwa Robin Logan iahonwén:nonke ne Rotinonhsón:ni Onkwehón:we Iorihwakaión:seron Tsi Ieientáhkhwa ahonkià:taren ne raoná:wen tenhonkierónnion "Tonto, Wa'tohserò:ton tánon Kanawa'ahtó:ton: Sanonhtón:nion Onkwehón:we Ka'nikonhríson ne 21 Teiohsenhserón:ton" Skáthne Ms. Logan ienenhrí:ne, rontoweiénstha wahonterien'tatshén:ri ne ahtirahstánion aiokén:ta'ne tsi is nón:we tsi kontiweién:te tánon í:iah eh nón:we thakonwatiià:taren ka'nikonhríson oh nahaia'to'ténhake ne Onkwehón:we. Ne ka'nikonhríson tsi nihaia'to'ténhake ne onwekhón:we kahsto'serohrókhon rononhwaró:ron ne entewate'nienténhston ne tsi nihotiianerenhserotén:shon tsi nihotirihó:ten rati'niénthos tánon tsi ní:ioht ne ratiwennaráhstha thihatié:rons ronakiohkowá:nen ne ken'nikanenhrá:sa ne tsi nén:we tsi nontaiohtonhákie.

Ms. Logan wahonwatiia'tarahstánion tóhkara nihá:ti ne Onkwehón:we rontoweiénstha ne kaio'ténhsera. Tsi nahò:ten wahtró:ri ne karáhston ne rontoweiénstha í:iah né:'k té:ken tsi ratihsén:nare tóka ó:ni kanakeráhtshera akwé:kon tsi nihá:ti rontoweiénstha oh nahò:ten rotí:ien tánon ratiweién:te. Skáthne ne tehonwatihshwanéten tsi ionkwèn:rare tánon ne Roia'tatokénhti Regis Kanien'kehá:ka Onkwehón:we's Johnson O'Malley ratíhsere, rontoweiénstha ón:ton wa'thontstikáhwha tsi niió:re kahnhotónkwen wahonwatikhwahéhrhahse tsióhsera tsi náhe ne Onerahtohkó:wa Kanien'kehá:ka okióhkwa ohén:ton í:iete Mallory Sunday tánon eh ítsiete

Keely Thompson-Cook ioianere'ón:we taiontá:ti ne karáhston rotinatahré:nen tsi tkakhwáhere.

Karáhston wahatihsén:non Teiakwattíhen kén:ton, akwé:kon tetewattíhen tánon ó:nen iekaiéhston ne Rotinonhsón:ni Onkwehón:we Iorihwakaión:seron Tsi Ieientáhkhwa kwáh tsi nén:we ratirò:roks. Nahé:'a ne karáhston rotirákwen ne tsi thatihiatónhkwa ne rotinatahré:nen kaia'takehnháhtshera ne Kanón:no tánon ón:wa nikahá:wi ronwatiníhen ne Kanón:no Ohstoronòn:ke Kanonhsowá:nen Tkanónhsote ne Skanéhtati tsi nón:we thonatenaiéhston.

https://humanitiesny.org/breaking-down-stereotypes-at-the-iroquois-indian-museum/

https://www.northcountrypublicradio.org/news/story/35059/20171114/proud-to-be-mohawk-massena-students-flip-the-script-on-native-stereotypes