Indian Time - A Voice from the Eastern Door

Wahonten'nikonhró:ri Ne Onkwa'tere'kó:wa

 

Ronakiohkowá:nen ne ron'therón:ni tsi nihá:ti wahonwatiié:nawa'se ne "Wa'therowá:nen" wahonnón:ni wahonwatihsennakará:tate. Oh nahò:tenk wahonwatihahrháhse wa'thonwatinòn:waron tsi nihon'theraweiénhen tánon tsi nikarì:wes ne shihotiió'te. Ratiia'tarónnion akwé:kon ne ron'ta'therón:ni tsi nihá:ti ón:ton iahotike'tohtánion tsi onterihwahtén:ti. Rotiráhston thonatká:wen SRMT Communications.

Iehiá:tons: Jaclyn Hall

Okaristiiáhne, Ohiarihkó:wa tewáhsen ià:ia'k shiská:rahkwe, 2018 ne Ahkwesáhshne Tehontstikáhwhas Raontinèn:ra wahonwatihonkarawíhon okarahshnéha nikahá:wi ne wahonten'nikonhró:ri, wahonwatihsennakará:tate ne ionia'ténion ron'theraweientehténion tsi nikaná:ta ne Ahkwesáhshne. Tho nón:we nahoten'nikonhró:ri ne Ahkwesáhshne Kanónhsa Ratiia'takwe'ní:io Ronwatirihonnién:ni Tsi Ionónhsonte tkanónhsote ne 378 Satsherá:ti Iohatákie 37 Ahkwesáhshne nón:we. Tsi niiawénhsere 5:00 o'karahshnéha tontáhsawen, ónhkak wa'thonwatinón:waron iahontahsónteren en Onkwehón:we Othorè:ke Nonkwá:ti Tsi Iaonhwentsiá:ien Tehontstikhwhas Tsi Ionteweienstahkhwa'kó:wa (NNATC) wahatirihwahnhotón:ko ne Ohén:ton Karihwatéhkwen, ohén:ton tsi niió:re tontáhsawen tsi nahò:ten waterihwahtenkia'tà:ne. Gail McDonald, ohén:ton í:iete ne Ahkwesáhshne Tehontstikáhwhas Raontinèn:ra, wahonwatihtháhrhahse ne ronataweià:ton, wahonwati'nikonhraientáhten oh ní:ioht tsi tahón:kerahkwe ne "Wa'therowá:nen" tánon akwé:kon tsi nihá:ti wahontahshnienónnion tsi ón:ton wahonterihwahténkia'te. Wahón:nise ó:nen shiwatákie kí:ken kaio'ténhsera ne kéntho ratinakerénion ronta'therón:ni, taontahón:kerahkwe kí:ken iohseratákie. Ne "Wa'therowá:nen" kahnió:rahkwe ne 2017 Ahkwesahshnéha Tsi Tethotinonniahkwén:tahkwe, ronakiohkowá:nen ronatohetstonhákie wahotinehrá:ko tsi niióhskats tánon sénha wahatiná:iehste. Wahonwatiri'wanón:tonhse ne iota'terón:ni ahonwatiié:nawa'se ahontenén:wenhte éhsa o'nón:na énska iaonsaká:ienhte tahon'theratá:se. Ronakiohkowá:nen wahontahshnié:non ahonnón:ni ne "Wa'therowá:nen." Akwé:kon ne ron'terón:ni tsi nihá:ti wahontahshnié:non ahonnón:ni ne "Wa'therowá:nen." Ehtà:ke ratihsennarónnion:

Edith Chubb

Judy Hemlock Cole

Debbie Cook-Jacobs

Lorena David

Richard David

Carrie Hill

Julie Jacobs

Talon Jacobs

Denise Jock

Angello Johnson

John Sawatis-Johnson

Josephine Lazore

Robin Lazore

Delia McDonald

Laura "Molay" McDonald

Tobi Mitchell

Ann Mitchell

Laura Mitchell

Russel Phillips

Nanci Ransom

Sheila Ransom

Wanda Sharrow

Dyan Swamp

Glenn Swamp

Curtis Terrance

Delia Terrance

Ann Wheesk

Gary White

28 nihá:ti ron'therón:ni wahontahshnié:non wahonnón:ni ne "Wa'therowá:nen" tsi ón:ton. Énskak ká:ien ne eh niwa'therò:ten tánon rorihowá:nen ne Ahkwesáhshne aioién:take. Ne "Wa'therowá:nen" enhontená:iehste tsi nikaná:ta ne Ahkwesáhshne ohén:ton tsi niió:re ienkakón:tahkwe enhonteweièn:ton ne Ahkwesáhshne Tsi Niionkwarihò:ten Ronkia'tarohrókstha Tánon Orihwakaión:seron Tsi Ieientáhkhwa. Ó:nen thó:ha shaontó:'kten akohwá:tsire ne Mary Adams (Kawennotákie) wahonwatihtháhrhahse tsi nihá:ti rón:neskwe. Ióhskats tsi ní:ioht tsi wahtehshakotirénhsaron tsieià:ta ne kwáh iehsennowá:nen ne ion'theraweienhehtón:ne. Watenaiéhston ókia'ke ne Mary Adams (Kawennotákie) ako'thereshón:'a skanonhsakará:ti wa'okén:ta'ne tsi niionia'tón:ne tánon wahonwatina'tón:hahse ne rón:neskwe tsi na'tewa'thé:rake ne akaónha iakohníson tánon iakoterien'tatshénrion tsi niwa'therò:ten. Iakoterien'tahtsheriá:'kskon. Wahonnì:ron ne Mary Adams (Kawennotákie) akohtsià:na iakononhwénhton aktónkie ne 25,000 niwa'thé:rake tsi niiakónhnhes. Ne aonhá:'a iorihowá:nen onterihwahtén:ti tahonwanatká:neren akwé:kon ne ron'therón:ni skáthne rón:nete wa'thonwatinonhwará:ton tsi nahò:ten ratiweièn:te.

Wahati'horókshi ne "Wa'therowá:nen."

Penny Peters, ohén:ton í:iete ne Ahkwesáhshne Tehontstikáhwhas Aonèn:ra wa'ì:ron "Í:kehre takhenonhwará:ton ne Ahkwesáhshne Orihwakaión:seron Tsi Ieientáhkhwa wahatihní:non ne otsísera ionnià:ton tkanahstónhkwa. Niawenkó:wa." Ne tkanahstónhkwa í:iah tewatstón:ne tsi nikarì:wes ionkwaterihwahtenkià:ton né:'e tsi ní:wa tánon né:'e tsi í:iah tha'ón:ton ia'takaié:ri'ne tsi nón:we nihonwatirihonnién:ni ionáktote. Né:'e tóka kí:ken oh na'kénhkha ne onkwe'tà:ke enwá:ton ákta aonhtkáhtho ne "Wa'therowá:nen" ohén:ton tsi niió:re enwate'rhò:roke. Tóka ensate'shennaién:ta'ne ahsatkáhtho ne "Watherowá:nen" kwáh í:ken tsi iorihowá:nen tóka aesewatatenaktóthahse taesewá:ta'ne tánon aesewatkáhtho tsi nihon'theraweientéhtenion tánon tsi nihatinorónhkhwa ne raona'thera'shón:'a ne Ahkwesáhshne "Wa'therowá:nen."

 

Reader Comments
(0)

 
 

Powered by ROAR Online Publication Software from Lions Light Corporation
© Copyright 2018