Indian Time - A Voice from the Eastern Door

Iehiá:tons: Jaclyn Hall

Ronwaia'tanentaktónhne, Ohiarihkó:wa 27, 2018 ne Ahkwesáhshne Tsi Niionkwarihò:ten Ronkia'tarohrókstha Tánon Orihwakaión:seron Tsi Ieientáhkhwa ohna'kénhka sahontóweienste ne ratiksa'okón:'a ronta'therón:ni. Ne rontoweiénstha né:'e ne ohna'kénhkha ne wísk nia'ká:ienhte wahontóweienste tsi nikarì:wes ne teiohia'kserà:ke nikarì:wes ohén:ton thonatsawen. Ne shakorihonnién:ni, Levi Herne, kwáh ionnià:ton tsi wahshakorihónnien thó:ha akwé:kon ne oié:ri nihatíhne wahatíhsa ne raoná:there ohén:ton tsi niió:re ne ohna'kénhkha aonsahonatoweiénston. Thí:ken rontowiénstha wahatirá:ko iahontahsónteren ahonnón:ni ne tekeníhaton à:there. Ahsheiaterò:roke kí:ken ken'nithotiión:sa iohshnó:re tsi wahonta'therón:ni tánon thó:ha kwáh ieká:ien tsi tahontoweièn:ton entsioia'tahníhrha'ne ne Ahkwesáhshne shé:kon enkaién:take ne kwáh í:ken tsi ióhskats ahon'theraweientehtónhake tánon thí:ken ne tontahonatehiahrónkie ne ron'ta'therón:ni tontahonenonhákie. Ratiksa'okón:'a skenen'shón:'a tsi wahonwatirihónnien tsiorihwátshon tánon wahatiweientéhta'ne kiokierenhtáhkwen ken'nithoión:'a shakorihonnién:ni oh ní:ioht ahonnón:ni ne éhsa ionnià:ton ne à:there tsi ní:ioht tsi enthatáhsawen tsi ní:iore ienháhsa.

Konwawennaráhkwa Jock iakohkwíshron ion'therón:ni ne tekeníhaton akò:there.

Levi Herne ro'nisténha wahonwarihónnien Sue Ellen Herne iontákia'ts. Ó:nen nón:wa raónha sehshakorihonnién:ni thikawenní:io ónhka entho'nikonhratihéntho ahatóweienste. Tsi ní:ioht tsi enhska'én:ion ne raona'there'shón:'a raweién:te ne ahshakorihónnien. Thó:ha akwé:kon tsi nikarì:wes, onkwehshón:'a enhonnonhtónnion ne ron'therón:ni tóka shí:ken ne Tóta né:'k tsi í:iah akwé:kon ne ionnià:ton ron'therón:ni entá:on'k Tóta akénhake. Levi shaià:ta ne ken'nithoión:'a roterièn:tare oh ní:ioht ne aion'therón:ni tánon roio'tenhserí:io. Ne Ahkwesáhshne Kanien'kéha Tsi Iewennahnotáhkhwa ronhtenkià:tha nia'teiotikióhkwake ahon'therón:ni ahontóweienste – tóhsa tensatóhetsten aesate'sennaién:ta'ne ahsheweientéhta'ne oh nahò:tenk tsi niionkwarihò:ten ahsón:ni enwá:ton iensehsherihónnien ne kanakerahtsherà:ke ne kanakerahtsherà:ke.