Indian Time - A Voice from the Eastern Door

MCK Í:iah Tha'tahatirihotáhrhoke Ne Miller Aorihwá:ke

 

Kahnawà:ke – Ne Ohiarí:ha 6, 2018, ne Kanien'kehá:ka Ratitsiénhaiens ne Kahnawà:ke (MCK) tahatirihó:wanahte í:iah tha'tahatirihotáhrhoke ne tsiaontarí:kon Teieia'torehtha'kó:wa tsi nahò:ten ia'tehotirihwaientá:se aorihwá:ke ne Miller v. Kanien'keháka Ratitsiénhains Ne Kahnawà:ke. Ia'tekarihwaientá:'on ó:ni ahshakotikária'kse tsi ní:ioht tsi ronwatihró:ri tsi tekaia'toréhton. Tsi ia'thotirihwaién:ta'se ahónta'we tsi í:iah tha'tahatirihotáhrho'ke akwé:kon rotirihwanonhwé:'on, né:'k tsi ia'tehotirihwaientá:se ne ahonwatikária'kse wa'tewatóhetste 9 ne 3, skáthne ne Ratitsiénhaiens Billy Diabo, Carl Horn and Kahsennenhawe Sky-Deer wahatirá:ko tóhsa akakariá:kon. Tetsiá:ron tsi nahò:en ia'tekarihwaientá:'on, tsi ronatkennisen'ón:ne Awentata'ónke, Onerahtohkó:wa 28, 2018. Ia'tekarihwaientá:'on.

"Tsi niió:re ieió:ken ne aonhá:'a ne aionkwaianeráhsten onkwarihwá:ken iaetewatahsónteren ne onkwaná:ta, aonsaionkwa'nikónhnhen tsi niiáh teion'wésen tsi nahò:ten wa'titewatóhetste, ne onkwanatà:ke" wahèn:ron ne Grand Chief Joseph Tokwiro Norton. "Tsi ní:ioht tsi tetewaká:nere, tsi karihwénhton í:iah kwáh tha'teiotenonhianihtá:'on – í:non ieiótte, orihwí:io tsi iakión:nis. Wa'akwarihwanón:we'ne ókiake tsi nahò:ten wa'thatiiatorehtánion, tsi ní:ioht tsi ionkwathró:ri ne kiokierénhton kí:ken tsi nahò:ten karihwatákie. Tsi akwé:kon ia'teionkwarihwaientá:se ne taionkwarihotahrhónhake. Kí:ken átste nonkwá:ti tethatiia'torehthà:ke, í:iah thé:nen thaionkwaia'takéhnhe ne onkwarihwa'shón:'a"

$35,000 ne akwé:kon enhshakotikáriakse tsi niká:ien ne iehonwatirihwahrá:ni. 4% ia'ká:ko tsi ní:kon wa'thontate'nikonhnhá:ren ronnéhsaks. Kwáh ken' nihá:ti ne Ratitsiénhaiens wahatirihwanón:we'ne nahshakotikáriakse, né:'e tsi wahshakoti'nikonhraientáhten tsi eh nahatí:iere ne tóhsa sénha taonkerónnion."

Grand Chief Norton iahahsonteren. "Wa'onkwaia'taté:ri'ne sénha é:so aionkwatkaronní:'on. Ne wa'thontate'nikonhá:ren, kíken ohwísta tho nón:we entá:on'k tahatirá:ko tsi niká:Ien ronathwistatoweién:ton. Kíken ohwísta aiotón:'on tho nón:we ahonátston tsi nón:we ne ókiake kenkiohkwakè:ron tho nathwistoktá:ni tsi nón:wa ní:ioht ne Ken'nithotiión:sa Raotikióhkwa, Onkwawén:na tánon Tsi Niionkwarihò:tens tánon Tehontsihkwá:'eks tánon Ronten'nikonhroria'táhkhwa. Né:'k tsi entá:'onk entewatshé:ri ók ní:ioht tsi enionwaió'te ne aionkwaianeráhsten."

Oh na'kénhkha enkiakwawenníneke'ne ne MCK shonwennehiahrahkwén:nis ne Kaná:ta skén:nen akénhake tánon tahontaterihwakweniénhstake ne né:'e aorihwà:ke tánon to ó:ni ní:ioht tsi ahontakia'tahténkia'ke.

 

Reader Comments
(0)

 
 

Powered by ROAR Online Publication Software from Lions Light Corporation
© Copyright 2018

Rendered 01/13/2019 14:17