Indian Time - A Voice from the Eastern Door

Indian Time iotshennón:ni aontakarihón:wanahte Dorothy Karihwénhawe Lazore tánon Mary Iotenerahtaténion Arquette onkwè:tase Indian Time saionkhiiakia'táhrhahse. Niawenhkó:wa tsi nón:we saionkhiiakia'táhahse ne Ahkwesáhshne Kanà:ta.

Karihwénhawe tánon Iotenerahtaténion tekeniwennaté:ni tékeni tóka ó:ni Karihwáke Indian Time kakararónnion kiohrhén:sa kanien'kéha tsi enkahiá:tonke.

Ronakiohkowá:nen ne Ahkwesashró:non rontá:ti, ratiwennahrótha tánon ratihiá:tons ne Kanien'kéha, Indian Times rón:nehre ahatirihwahní:rate kí:ken kaio'ténhsera, ahonwatihretsiá:ron tsi nihá:ti ratiwennahnótha ahatiwennahnó:ten tsi nahò:ten kakaratákie Kanien'kéha akahiá:tonke.

Dorothy Karihwénhawe Lazore B.E.D. CAL Iakohiatonhserá:ien ne linguistics, ionhrónkha, iewennahnótha tánon iehiá:tons ne Kanien'kéha tánon iakotóweienston ahonwatirihónnien iakohiatonhseronniánion aóntston tsi iontoweienstahkhwaniónhkhwa tánon teiewennaténies ne kakorahtsherakónhshon rónstha. Kaié:ri niiohserá:ke wahonwatiríhon ne Á:se Tsi Tewá:ton. Shakotiienté:ri ne Koráhne tánon tsi Kanenhstaténion. Karihwénhawe shakotihsennakaratá:ton tsi ní:kon iakoio'tén:'en, iakotste'niá:ron aonsontónhnhete ne Kanien'kéha.

Mary Iotenerahtaténion Arquette DVM/PHD wísk iawén:re nikarì:wes shiiakoió'te ne iewenninekénhtha ne Kanien'kéha owenna'shón:'a, kawennaráhston tánon tsiewennahseronniánions ne Kanien'kéha owén:na. Nahé:'a kaié:ri niiohserá:ke wa'ontóweienste ne Ahkwesáhshne Á:se Tsi Tewá:ton Wahonwatirihónnien ó:ni ahatiienthóhseron tánon tsi nikakhò:tens ne wahón:nise rón:nekskwe ne onkwehón:we. Karihwénhawe tánon Iotenerahtaténion tenkeniwennaté:ni kwáh ken' nikaká:rake ne orì:wase kakaratákie, kaná:ta tsi nahò:ten orì:wase tánon tsi nón:we na'titewatawén:rie onhwentsià:ke orì:wase.

Kí:ken kaio'ténhsera Ahkwesáhshne Kaná:ta Tsi iehwistaientáhkhwa tahonhtka'we tahónhtka'we ne ohwísta wa'thatíhshnie.