Mohawk Lesson

Énska iawén:re nihá:ti onkwehshón:’a ken’nithotiión:sa,

tsiá:ta nihá:ti ratinekénhterons rotisken’rakéhte tánon

kaié:ri nikón:ti tsionathonwí:sen kontiià:tase’s rononkwehón:we

rontá:wens tékeni niiohwistá:’e iotohétston nénkie, Entákta

akenhnhà:ke nikahá:wi, átste nonkwá:ti tsi iontawenstáhkhwa

aten’èn:rakon , ákta tsi tehshakotitsiéntha ne Kahnawà:ke

kanà:takon tsi kanenhstá:ton, né:’e tsi sótsi io’taríhen

nátste, rona’tarihén:’en tánon ronatewistóhton. Ronon’wéskwani

ahontá:wen. Rotináktote né:’e tsi ronatoríshen tsi

ionteweienstáhkhwa tánon iáh entá:on’k thahotiio’ténhsera.

Shaià:ta ne ranekénhteron ia’thani’tsiónhkwahkwe ahathón:rohwe.

Shaià:ta ne ranekénhteron tsi kahson’karóhare í:rate

ratshá:nis ahathón:rohwe. Shaià:ta ne ranekénhteron, ieià:tase

awèn:ke iahshakò:reke. Shaià:ta rotawenhákie. Shaià:ta

rotoríshen roia’ta’kerá:ne, aktónkie tsi iontawenstáhkhwa.

Tehniiáhse tehninekénhteron tsi tewanitskwahra’tsheróhare

thnítskote ronaterahkwawehrhóhston ronwatiia’tanónhnha

ni’nikòn:rare tóhsa thé:nen taka’nióhsken’ne.

Tsieià:ta ieià:tase, í:iete, anitskwahra’tsherákta

ieionhtsiá:tons, ronwahretsiá:rons ia’tahani’tsionhkwahkwe.

Tsieià:ta ieià:tase teiakotate’nionhsawá:kon, tsi iahshakò:reke

ne awèn:ke. Tekeniiáhse tekeniià:tase kanekotà:ke kenítskote

iotiká:raton, ó:nen ionatawénhsion, ionatenhararikonhákie.

Ion’wé:sen ne akenhnhà:ke nikahá:wi. É:so tsi io’nikonhrória.

1. Énska iawén:re nihá:ti onkwehshón:’a ken’nithotiión:sa 11 young people

2. Tsiá:ta nihá:ti ratinekénhterons rotisken’rakéhte 7 are young men

3. Kaié:ri nikón:ti tsionathonwí:sen kontiià:tase’s 4 are young women

4. Rononkwehón:we rontá:wens The native people are swimming

5. Tékeni niiohwistá:’e iotohétston nénkie 2 o’clock

6. Entákta Saturday

7. Akenhnhà:ke nikahá:wi Summer time

8. Átste nonkwá:ti tsi iontawenstáhkhwa At the outdoor pool

9. Ata’èn:rakon In the fence

10. Ákta tsi tehshakotitsiéntha ne Kahnawà:ke Near the hospital in Kahnawà:ke

11. Kanà:takon tsi kanenhstá:ton In the village, on the reserve

12. Né:’e tsi sótsi io’taríhen nátste Because it is too hot outside

13. Rona’tarihén:’en tánon ronatewistóhton. They are hot and they are cooling off

14. Ronon’wéskwani ahontá:wen. They enjoy swimming

15. Rotináktote né:’e tsi ronatoríshen tsi ionteweienstáhkhwa They have time because they are on a school break

16. Iáh entá:on’k thahotiio’ténhsera. It is not necessary that they go to work

17. Shaià:ta ne ranekénhteron ia’thani’tsiónhkwahkwe ahathón:rohwe. One young man he is jumping over there he ought to dive

18. Shaià:ta ne ranekénhteron tsi kahson’karóhare í:rate One young man is standing on the board

19. Ratshá:nis ahathón:rohwe. He is afraid to dive

20. Shaià:ta ne ranekénhteron, ieià:tase awèn:ke iahshakò:reke. One young man is pushing a young girl in the water

21. Shaià:ta rotawenhákie. One male is swimming along

22. Shaià:ta rotoríshen One male is resting

23. Roia’ta’kerá:ne, aktónkie tsi iontawenstáhkhwa. He is floating near the edge of the pool

24. Tehniiáhse tehninekénhteron tsi tewanitskwahra’tsheróhare thnítskote 2 young men are sitting high in a chair

25. Ronaterahkwawehrhóhston They are shaded under an umbrella

26. Ronwatiia’tanónhnha ni’nikòn:rare tóhsa thé:nen taka’nióhsken’ne. They are watching over them so there are no mishaps

27. Tsieià:ta ieià:tase, í:iete, anitskwahra’tsherákta ieionhtsiá:tons One young man is standing near the chair pointing over there

28. Ronwahretsiá:rons ia’tahani’tsionhkwahkwe. She is encouraging him to jump

29. Tsieià:ta ieià:tase teiakotate’nionhsawá:kon tsi iahshakò:reke ne awèn:ke. One young woman is plugging her nose when he is pushing her in the water

30. Tekeniiáhse tekeniià:tase kanekotà:ke kenítskote iotiká:raton 2 young women are sitting on the steps talking

31. Ó:nen ionatawénhsion They have finished swimming

32. Ionatenhararikonhákie The females are getting suntanned

33. Ion’wé:sen ne akenhnhà:ke nikahá:wi. It is nice in the summer time

34. É:so tsi io’nikonhrória. It is a lot of fun