Ahkwesáhshne TV Ronwaia'tarákwen Iehawenónhne Kaianerenhserà:ke Wa'thonnónhetste Onhwentsiakaión:ne Nonkwá:ti O'serón:ni Tsi Thatinákere Paris Konwá:iats

Taséhnhe thiionkwehonwehseraténion onkwehshón:'a raononhwéntsia aianerénhsera tánon ne onhwentsiakwé:kon tenhotíhshnie, UN ronakia'tarò:ron iehatiia'taié:ri wahonnì:ron

Teiohsénhseronte ne ronwatihshennakaratá:ton ne Thiionkwehonwehseraténion ratiia'takwení:io ratinenhrí:ne wahonkia'tarò:roke Kanón:no Kaná:ta ne UN Teká:neren Kioteróhon Kanakeráhtshera Ieiokontáhkwen Ronakia'tarò:ron ne Thiionkwehonwehseraténion Raotirihwa'shón:'a ne Enníska 1, 2019. Ne Kioteróhon Kanakeráhtshera rotihrhá:re aontahonwati'nikòn:ron tsi ní:kon ionkwákion onkwarihwa'shón:'a tsi wahonhténkia'te ón:wa iohiakseratákie ne khia'tekanakerahtsherátere óhsera ne Raotiwenna'shón:'a, tsióhsera nikarì:wes nikaio'ténhsera, ahonwatiié:nawa'se aontahonwatíhnhe kí:ken iowennakaión:seron ronhrónkha. Ne Kioteróhon Kanakeráhtshera Ronakia'tarò:ron wahonnì:ron 2019 tsi ní:ioht ne Kioteróhon Khia'tekanakerahtsherátere Aóhsera ne Thiionkwehonwetsherá:te Raotiwenna'shón:'a ne aón:ton onhwentsiakwé:kon iahonwatihkahronká:ten tsi niiohnhá:ten tsi nahò:ten tehatiká:nere ne Thiionkwehonwehseraténion ne raotiwén:na aorihwá:ke tánon tsi niiorihowá:nen ne ahatihá:wake akakwatáwen, ska'nikòn:ra aonsón:ton taonsahatirihwaié:na, ioiánere tsi ahontáthawi tánon skén:nen tsi ahonterihwahténkia'te.

"2019 entá:on'k tenskarihwakahrhánion skanèn:ra tsi entsitewatste'niá:rontste ne tóhsa aionkwá:ti ne onkwawén:na tánon tsi nihá:ti ronhrónkha," Maria Fernanda Espinosa, ohén:ton ieia'takwe'ní:io ne Kanenhrakwé:kon wahonwatihró:ri ne UN Ronakia'tarò:ron ne Ronwaia'tanentaktónhne.

Tsi nihá:ti ne 7,600 raotiwén:na rontá:ti onhwentsiakwé:kon 2,680 Thiionkwehonwehseraténion

Owenna'shón:'a rótteron ahoná:ti tánon é:so shé:kon iohton'onhákie iohshnorákie, tsík tóka ok nenkaié:ren ne aonsontónhnhete, wahonnì:ron ne UN raononkwe'ta'shón:'a.

"Khia'teiahia'kserá:te, skawén:na ne Thiionkwehonwehseraténion raotiwén:na enwáhton, iorihowá:nen," wahèn:ron Ernesto Ottone-Ramirez, tekeníhaton shakoienawà:se ohén:ton í:rate ne UN's tsi nahò:ten thonehtáhkwen raotikióhkwa UNESCO.

Ne kaianerenhserà:ke wa'thonnóhetste onterihwahtén:ti ne Kioteróhon Kanakeráhtshera Karihonnién:ni tánon Ohontsia'kéhkha Tsi Niionkwarihò:ten Kenkióhkwaien (UNESCO) Tsi Tkanontsístaien ne Paris, France O'serón:ni Tsi Thatinákere tánon Regan Jacobs, Ahkwesáhshne Tká:ras iehawenónhne ne Tsiothohrkó:wa 28th shakohshennakaratá:ton ATV's thonateróhon kí:ken UN thonatáhsawen ronterihwahtenkia'tá:ne. Jacobs wa'ì:ron "Kheiatahónhsate ne Victoria Tauli-Corpuz, tsi niká:ien ne Kioteróhon Kanakeráhtshera Ierihwarò:roks ne Raotiianerénhsera ne Thiionkwehonwehseraténion Onkwehshón:'a tánon iakóhthare tsi kioterihwahtenkià:ton tsi ní:ioht ne onkwawén:na aoianerénhsera thó nón:we nienhén:we ne ronónha ahonatstenhniarónhake, tánon tsi ní:ioht ne kaná:ta–aówen tewatewennarenià:tha enwá:ton teniakohsónteren ne onkwehshón:'a, ne teiokierónnion ne karonwarà:ke. Enwá:ton ó:ni skáthne eniethiia'tarò:roke tánon skáthne tsi nón:we enhonnè:sheke ne ken'nithotiión:sa onkonkwe'ta'shón:'a. Wa'kanonhtonnión:ko, Ahkwesáhshne Tká:ras tho nikaiéhrha, ronakiohkowá:nen ronwatirihwahrá:ni tsi nahò:ten karihwatákie ahonthrória'te ne aón:ton áhontste tahatihtharónnion tánon teiaonkóhton ne Kanien'kéha owén:na tsi nahò:ten kionkwehtáhkwen tánon tsi niionkwarihò:ten kwáh ionwatonhnháhere."

Ne kaianerenhserà:ke wa'thonnóhetste ne Paris nón:we skáthne wa'thatiié:na wahatirihwahserón:ni ne UNESCO, UNDESA, tánon ne raononkwe'ta'shón:'a ne Thotiniarotáhrho Kanèn:raien né:'e aó:wen ne kenkióhkwaien ne tsi na'tekanakerahtsherátere Óhsera, ó:ni ne ronákia'ke ronakià:taren thihatí:te thonahtka'wánion. Tahontó:rohte ne karihwatákie ne "Thiionkwehonwehseraténion owén:na aorihwà:ke ne ahatihá:wake akakwatákwen, skén:nen tsi ahonterihwaténkia'te tánon taonsahatirihwaié:na," ne tsi nahò:ten onterihwahtén:ti wahonwatiia'tarò:rokte ne kwáh é:neken thonatténion Kakorahtsherakónhshon ratiia'tá:ron, Thiionkwehonwehserá:te onkweshón:'a, onkwe'tà:ke, ronathiatonhseraweiénston, ratiwennaráhstha, orì:wa tánon enhsehià:rake kanenhraién:ton Kioteróhon Kanakeráhtshera (UN) aonkwe'ta'shón:'a, onkwe'tà:ke owén:na ratironnón:ni tánon ratihiá:tons kanonhsó:ton tánon rononhá:ak tsi ronatatón:ni. Ne kwáh iorihowá:nen wathontká:neren tánon wahatíhsere kí:ken kaianerenhserá:ke wahonterihwahténkia'te wahón:nehre aontahónhtka'we onhwentsiakwé:kon akanenhraién:take ne ioianere'ón:we tahatihtharónnion tsi nón:we aón:ton ne é:neken thonátte ratiwenní:ios aontahontá:ti aontahonten'nikonhráhtka'we á:se tsi ní:ioht tsi aontahatíhnhe, tahonterihókwahte tánon aontahónhtka'we aonkesénhake tsi nón:we ahatirihwakóha ne Thiionkwehonwehseraténion owenna'shón:'a róntstha."

Kanen'tó:kon Hemlock (Kahnawa'kehró:non), ronwaríhonte ne Rotinonhsón:ni Ratitsiénhowá:nen ne Rotiianéshon waharihwahnhotón:ko ne é:neken thonátte ronakia'tarò:ron, tsi nihokwénion tsi ohén:ton ranenhrí:ne ne Rotinonhsón:ni Átste Nonkwá:ti Tehontátkens Aokióhkwa.

IYIL2019 tenhonterihwarénia'te Thiionkwehonwehserá:te Owenna'shón:'a kí:ken wísk ní:kon iokwèn:rare.

1. Enwatehià:ron ne sénha ahoti'nikonhraié:ta'ne aonsahatirihwahseronniánion tánon tsi na'tekanakerahtshehrátere taonsahatiié:na.

2. Akarihwakwatákwen ioianere'ón:we tsi nón:we nihotiio'ténion ne tahontáteni tsi nahò:ten ronaterièn:tare tánon aontonhtká:wen ioianere'ón:we tsi nahatí:iere ne Thiionkwehonwehseraténion owenna'shón:'a.

3. Ahatí:ren ne Thiionkwehonwehseraténion owenna'shón:'a aiorihwatokénhake tsi ní:ioht tsi ahonwatirihónnien.

4. Aonsahonwati'nikonhrahní:rate áontste tsi ní:ioht tsi rotikwenonhákie.

5. Aontehià:ron tánon akarihwahseronníhake tsi nón:we sénha ahatkaranó:wanahte ne á:se aterien'táhtshera

Tsi niionkwarihò:ten wa'thatinónniahkwe tsi nihotirihò:ten ne Kwakwaka Tekontinonniáhkhwa ne É:neken Kiótte Wahonterihwahténkia'te iahatirihwá:reke ne tsi Na'tekanakerahtsherátere Óhsera Ne Thiionkwehonwehserá:ti Tsi Nihonhronkha'tsherò:tens.

Ionhsetahkwa'shón:'a

7000 owenna'shón:a rotihthá:ron onhwentsiakwé:kon

370 million teiohsenhseranéten (million) Thiionkwehonwehseraténion onkwehshón:'a onhwentsiakwé:kon

90 nikaná:take rati'terón:ton ne Thiionkwehonwehseraténion kanatakè:ron

5000 tekiattíhen Thiionkwehonwehseraténion tsi nihotirihò:ten

2680 tsi nihatiwennò:ten iótteron ahonahronkha'tsherón:ti