Indian Time - A Voice from the Eastern Door

Tekeníhaton Khia'teiohserá:ke Tsi Niiontkonwarò:roks Oháha Wahonterihwahténkia'te Ne Khia'tekanakerahtsherá:ke Tsi Ionten'nikonhroria'táhkhwa

 

Rotera'shwí:io, Odin McElwain, ón:ton wahonwaià:taren skáthne ne Teiona'taratsikhè:tare teiontonkwe'nanón:iani (Cookie Monster) tánon Oscar Rona'khwèn:'en (the Grouch) (Krista Oakes).

Iehiá:tons: Jackie Hall

Ken'nihonná:sa ratiksa'okón:'a wahonten'nikonhró:ri kí:ken Tekeníhaton, Kenténha 30th. Ne Tekeníhaton Khia'teiohserá:ke Rontkonwaró:roks Oháha tonterihwahténkia'te ne Kanakerahtsherá:ke Tsi Kionten'nikonhroria'táhkhwa tékeni shia'tesewahshé:nen tsi niió:re ne wísk niiohwistá:'e o'karahshnéha wahonwanate'shén:nen ne ken'nihonná:sa ahatiià:ken'ne tánon ahontkonwaró:roke í:iah tekaià:tare sótsi tahonnonhwarawénrie tsi nikahá:wi rontkonwaró:roks ne Ahkwesáhshne. Ne Roia'tatokénhti Regis Kanien'kehá:ka Onkwehón:we

Onkwe'tà:ke Ata'karitéhtshera Kaia'takehnháhtshera ne ohén:ton rón:nete wahonterihwahténkia'te. Tsieià:ta ne iakoterihwahtenkià:ton, Krystal Peters, wa'thonwatinonhwará:ton kahwá:tsire tsi tewatehnhotónhkhwa tsi iontkonwaró:roks oháha tsi nikarì:wes ronwatitsikhe'tanón:tens shahshakotiri'wanón:tonhse oh nonkié:ren tsi ronahiotenkià:ton, Iakoterihwahtenkià:ton Krystal Peters wa'ì:ron "Iákwehre ne ratiksa'okón:'a ahonata'kariióhake tánon ionkwaterièn:tare tsi é:so enhotitsikhe'taién:ta'ne enióhrhen'ne tsi niiontkonwaró:roks. Kí:ken ronwatirihwá:wis ne ken'nihonná:sa, áhsen na'tehonohseriiá:kon ahonate'shennaién:ta'ne ahatiià:ken'ne tánon ahonkià:taren aronhákien tóka shí:ken í:iah árok kwáh tehonatateweiennentá:'on ahatiià:ken'ne tahonhkwatá:se tsi ronatenonhsó:ton."

Tóhkara ní:kon ne rontoweiénstha wahonkià:taren tsi nahò:ten ioterihwahtenkià:ton, wahonta'tohseró:ton wa'tohserahserón:ni khiateiorì:wake tekiatén:rohwe tsi nahò:ten ronatkonwaró:ron. Ne Roia'tatokénhti Regis Kanien'kehá:ka Onkwehón:we Karíhton Rotinónhsote tánon Onkwehón:we Tethonwatiia'toréhtha, Roia'tatokénhti Regis Kanien'kehá:ka Onkwehón:we

Mr. tánon Mrs. Rotiia'taneráhkwa (Incredible) (Larry Steffenhagen tánon Sierra White) ronatateweiennentá:'on ahshakotitsikhe'tanontónnion.

Onkwe'tà:ke Ata'karitéhtshera tánon Kaia'takehnháhtshera, Ken'nihonná:sa Ronwatirihonnién:ni Kanèn:raien, Kanien'kehá:ka Ronateríhonte ne Ahkwesáhshne Onkwe'tà:ke Ata'karitéhtshera tánon Iekaia'taié:ri Ata'karitéhtshera tánon CAA Ronterihwahtenkià:tha tahoti'nikonhratihéntho ne Rontkonwaró:roks aotonhnhéhtshera. Tsi ní:kon kanenhraién:ton wahon'tohserotón:nion tánon wahonwatitsikhetanontónnion tsi nahò:ten rotí:ien. Ronakiohkowá:nen wahotike'tohtánion aronhákien tsi wa'okén:rore tánon iowistóhne. Iakoterihwahtenkià:ton Kora Mitchell wa'ì:ron, "Iákwehre oh nahò:tenk aiakwaterihwahténkia'ke ne ken'nihonná:sa raoná:wen. Tsióhsera tsi náhe tánon kí:ken iohseratákie wa'akwate'nién:ten ken'niiorihwá:'a aiakwahténkia'te ne ken'nihonná:sa raoná:wen. Onkenehrá:'a tsi nihá:ti iahotikè:tohte kí:ken iohserá:te. Né:'e kí:ken ne teiohserakiehákie tánon kwáh ken'nihá:ti sahotike'tohtánion sahonto'seró:ton. Iakwate'niéntha khia'teiohserá:ke iaiakwakón:tahkwe aiakwaterihwahténkia'te." Ronakiohkowá:nen ne kahwá:tsire ken'nihonná:sa, owira'shón:'a tánon í:iah árok tehontoweiénstha thonontahón:ne kí:ken ronaterihwahtenkià:ton ronatkonwarorókhon tánon tehotisteríhens tahonhkwatá:se tahonkerónnion, tánon ahotitsikhe'taién:ta'ne. Ne Rontkonwaró:roks Oháha ken'niió:re wa'tohseró:ton ón:ton ne ken'nihonná:sa ahonthahíta tánon í:iah sótsi tha'tahatihwihshén:hiie. Akwé:kon wahonten'nikonhró:ri, tóka shí:ken né:'k ne wahonwatiieronhá:ton wahonwatitsikhè:tanonte tóka ó:ni wahontkonwaró:roke tánon né:'k ne ahshé:ken ne ken'nihonná:sa rontkonwaró:roks tsi niioiánere tsi nahò:ten ronátston.

 

Reader Comments
(0)

 
 

Powered by ROAR Online Publication Software from Lions Light Corporation
© Copyright 2018

Rendered 11/15/2018 10:59