Ohahà:ke Enhatihahseraniiontónnion Tahontáhsawen

 

Enhatihahseraniiontónnion tontáhsawen. National Grid enhatihahseraniiontónnion í:iah thahatiká:raien, né:k ne khia'teiohserá:ke ratikária'ks tsi kanonwaráhere enhatikária'ke ne Onkwehón:we. SRMT Tehatihtháhrha raoná:wen ne í:kare.

Iehiá:tons Mahlon Smoke

Ahsonthèn:ne nonkwá:ti satorihákie sewakié:rens iótteron, sénha tóka shí:ken í:iah kwáh téhsken tánon í:iah khietsió:ken tesahahseróia'ke ne kà:sere ákte nonkwá:ti nontaionenonhákie. Akahahseraniión:take kiótkon ne teiotonhontsióhon akakwatákwen tsi ionkwanenhstá:ton né:'e tsi í:iah nonwén:ton tekenhníson ne akakwatákwen né né:'e ahonterihwahtenkià:ton. Ia'kará:tane, ne 2017 wahatihnísa tánon enhatihahseraniión:ten tahontáhsawen tsi iohatákie 37 enhatikwatá:ko LED enkahahseraniión:take sénha iaiokén:ta'ne tsi satorihákie ne tsi iohatákie ne 37. Tsi niió:re ne onkwe'tà:ke tahonten'nikòn:ron tánon tahontén:rohwe skáthne ne National Grid ahonwatiié:nawa'se ahatihahserohá:ren, tsi wahatikwatá:ko ne ahatihahseranión:ten tontáhsawen.

Ne Kenténha, tóka nón:wa ne wísk nikahahserá:ke wahatihahseraniiontónnion tánon rotirì:waien ahatikwatá:ko ahatihahseraniiontónnion tsi niensahonwí:sere tsi iohatákie 37, enhatí:ren tsi tekiathahá:sere ne Otskwa'rhéhne, Karà:ken Oháha tekiathahá:sere, tánon tsi iewennahnotáhkhwa iohá:te tekiathahá:sere. Brent Herne, SRMT rotikwatakwenhákie tánon tsi nikaieron'tò:ten, wahèn:ron "National Grid ienhatíhsa enhatihahseraniiontónnion ne iothahseratateránion (ienkaia'taié:ri'ne ne 31 nikahahserá:ke) kí:ken iohseratákie. Rotihrhá:re aón:wawe ne oháhsera. Tewakehtáhkwen kí:ken né:k ne entewatáhsawen ne enkahahseraniión:take tánon ó:nen ionkwaterihwahserón:ni skáthne ne National Grid, enwá:ton ientewá:iehste tóka ó:ni enkón'neke ne ohahsera'shón:'a thikawenní:io kátke."

Tsi niió:re iensewenhnitára'ne tóka ó:ni, LED enkahahseraniión:take tóhkara tsi tekiathahá:sere. Ne ohahsera'shón:'a wa'kiohshwáthe'ne ne ohaha'kéhson, sénha enhonakié:sen'se ne ahsonthén:ne rotóries tánon ne sewakié:rens karì:wes tekió:karas ronthahíta's ohahaktónkie. Tóka íhsehre sénha é:so ahserihwatshén:ri tánon iohwéntsiare iekaia'taié:ri tsi nón:we enhatihahseraniiontónnion, sátkens ne Roia'tatokénhti Regis Kanien'kehá:ka Onkwehón:we Tewa'á:raton Kawennarahsthà:ke (SRMT Website):

https://www.srmt-nsn.gov/news/2018/akwesasne-streetlight-installations-commence

 

Reader Comments(0)

 
 

Powered by ROAR Online Publication Software from Lions Light Corporation
© Copyright 2024