Roia'tatokénhti Regis Kanien'kehá:ka Onkwehón:we ronwatihrorihákie ne onkwe'tà:ke raononkwe'ta'shón:'a thí:ken Ohstoronòn:ke Tehatiristí:ia'ks tánon Tsi Karistatákie Kahnhé:'on (CBP) ionsahotirihón:ti ne tékeni-nikaieron'tò:ten (2D) Barcode Enhontóweienste ne Kentsià:ke Enhontáweia'te. Ne Barcode kawennahnótha ienwatahsón:terake enhonwatiríhon ne tehontstikáhwhas áhontste ne barcodes ohnà:ken ne iakotoriéstha raotihiatónhsera aón:ton tahatiristí:ia'ke, tsi nikarì:wes ne Ohstoronòn:ke Onkwehón:we rotirihwisá:kon sha'té:ioht tsi karonwarahrónnion ne Onkwehón:we onkwe'tà:ke raotihiatónhsera.

Tekeníhaton, Ohiarihkó:wa 11th raononkwe'ta'shón:'a ne Kentsià:ke Tsi Karistatákie ratì:teron wa'thontátken ne Ohstoronòn:ke Onkwehón:we Ronaterihón:ton tahatihtharónnion ahonterihwahténkia'te ne 30 niwenhniserá:ke tékeni-nikaieron'tò:ten (2D) Barcode Ahontóweienste. Ne Kentsià:ke Iontaweia'táhkhwa kiokierenhtáhkwen tehatiristiiá:ktha Onhwentsiakwé:kon áhontste á:se karonwarahrónnion kakwatákwen ne óksak akarihwaié:na ne tékeni-nikaieron'tò:ten (2D) barcodes. Wahatikwatá:ko ne ahónhton'te tsi í:iah thaonsahontokwè:tatste ne ronterístanonhne tahatiristò:rarake orihwa'shón:'a tánon entka'serón:nenhte tsi nikarì:wes tehonwatiia'tóhetste. Tsi nikarì:wes tehotihtharákies, aón:ton áhontste ne Onkwehón:we raoná:wen ronwatiienteritstáhkhwa raotihiatónhsera wahón:nehre énhontste né:'k tsi, ne kahiatónhsera kiotoktá:ni ne tékeni-nikaieron'tò:ten (2D) barcode oh nà:ken nonkwá:ti ne kahiatónhsera. Né:'e aorì:wa, ne tsi Iehiatónhkwa né:'e ne Ohstoronòn:ke Onkwehón:we Kiehiá:tons ó:nenk iakwawesá:kon ne barcode karonwaráhere ne aón:ton ahatí:ren ne Onkwehón:we onkwe'tà:ke raotihiatonhsera'shón:'a. Sénha é:so ratirihwíhsaks kí:ken á:se orì:wa ne Onkwehón:we ronwatiienteritstáhkhwa raotihiatónhsera tenhontáteni tsi nén:we.

Ne tékeni-nikaieron'tò:ten (2D) barcode karihwatokénhston kenhníson kahiá:ton oh nà:ken ne Ohstoronòn:ke tánon ne tekahontsiakhahshiónkwen iakotoriéstha raotihiatonhsera'shón:'a, tánon ó:ni ne thiká:te kahiatónhsera. Káhsere ne kenhníson tekatokénhston enkakwé:ni enwaterihwatoweièn:ton ne enkenhníson enwá:ton aonkiesénhake akawennahnó:take ne aónha tewanónhtons karonwaráhere. Tsi nikarihò:ten teskiaké:ren ne QR tánon UPC kahiatonhkwarónnion khia'tewenhniserá:ke tewátstha, tsi ní:ioht ne tsi iontenhninion'takhwa.

Ne kawennahnótha iohshnó:re enkarihwaié:na tekahwawén:'e tsi nón:we na'tekatokénhston barcode kahiá:ton oh nà:ken ne iakotoriéstha raotihiatónhsera, tsi niká:ien ó:ni róntstha ne Ohstoronòn:ke tánon kén:tho tsi tewanákere kaianerenhseríson, ó:ni ókia'ke ne rontkehrontákwas. Ne orì:wa ne kwáh óksak ieskarihwákwen né:'e sha'tekarihò:ten kahiá:ton ne ohén:ton ne iakotoriestáhkhwa raotihiatónhsera, skáthne CBP sewáttok né:'e khók róntstha ne orì:wa teiotonhontsióhon nahotiió'te kwáh né:'k ne ronwanatken'sénions.

Ne Kentsià:ke Tsi Karistatákie Rontaweia'táhkhwa ienhsatirhwínion'te ne áhsen niwáhsen niwenhniserá:ke tsi nikarì:wes enhotiió'ten kí:ken akenhnhà:ke nikahá:wi wahontkáhtho ne 3,000 % sénha é:so watstón:ne ne Ohstoronòn:ke tóka ó:ni tekahontsiakhahshiónkwen iakotonriéstha raotihiatónhsera ne iakoienteri'tstáhkhwa. Ne Ohiarihkó:wa 2018, 5,530 iakotoriéstha raotihiatónhsera tahonwatina'tón:hahse wa'thatira'né:ken ne 177 iakotoriéstha ne Ohiarihkó:wa 2017. Kí:ken ontehià:ron ratiwennahnótha kahiatónhsera iorihowá:nen taio'serón:nenhte tsi nikarì:wes wa'tewatóhetste, ne aonhá:'a ne Ahkwesáhshne Kanien'kehakahró:non né:'e aonhá:'a ronakiohkowá:nen tho tehontohetstánions. Tsi nihonatera'shwiióhston ne tékeni-nikaieron'tò:ten (2D) Barcode ratíhsere ionsahotirihón:ti tsi niió:re í:iah tekarihwató:ken.

Ón:wa nikahá:wi, tehatirihstí:ia'ks ne Kentsià:ke Iontaweia'táhkhwa í:iah tehotí:ien ne iakotoriéhstha roatihiatónhsera, ratiià:tare ne ratiksa'okón:'a, tóka ó:ni thiká:te kakoráhtshera – kiotká:wen iakoienteri'tstáhkhwa kahiatónhsera ienwatahshón:terake tenhonnóhetste thenhatihiá:ton. Tánon ó:ni iakoienteri'tstáhkhwa kahiatonhsera'shón:'a Onkwehón:we tsi nithonátte raotihiatonhsera'shón:'a tánon tehatiristiiaktáhkhwa aonhiatónhsera ienwatahshón:terake enhatiié:na.

Ne Roia'tatokénhti Regis Kanien'kehá:ka Onkwehón:we iehontahsónteren enthonterihwáhtka'we thiká:te enhshakotirihwahéhrhahse, ienhontahsónteren enhatirihwíhsake oh ní:ioht tsi tahatiristí:ia'ke aontakiatén:rohwe tsi niionkwaianerenhseró:ten, tsi ní:ioht tsi kahiá:ton ne ionkwaterihwahserón:ni tánon kaianerénhsera.