Indian Time - A Voice from the Eastern Door

Ahkwesáhshne 2018 Kaniatarowá:nen Wa'thontohtáhrho

Khia'teiohserá:ke kwáh rotinehrakó:'on ne watstáhshion wahonnó:ko

 

Kakwitè:ne sha'kaná:to'ne ne St. Regis Kaniataratákie nia'té:kon takáhawe – karákie ne iontenonhsarokstáhkhwa karístatsi ionnià:ton. Kwáh ken'nikanèn:rake ronatateweiennentá:'on ahonwatiié:nawa'se ahonnetahkwanión:ko ne kahonweià:ke wà:hontste ne ohén:ton nonkwá:ti iaketa'ahstáhkhwa tánon kahentà:ke iakohonwi'seretáhkhwa.

Iehiá:tons Kaniehtonkie

Ronwaia'tanentáktonhne Seskéha 3 shískare ne kenkiohkwà:ke ne Ahkwesáhshne wahonkia'tarò:roke ne Ahsénhaton Khia'teiohserá:ke Kaniatarowá:nen Wa'thontohtáhrho.

Kí:ken ioterihwahtenkià:ton skáthne tehotirihwaienawá:kon ne Kanien'kéha Ratitsiénhaiens ne Ahkwesáhshne Rontonhwentsianónhnha Tsi Ionkwèn:rare, ne St. Róren Kaniataratákie Kanónhsote, tánon wahonkià:taren ne tekeníhaton iohseratákie – ne St. Regis Kanien'kéha Onkwehón:we. Khia'teiohserá:ke ne Kaniatarowá:nen Tehontohtáhrhos iahonnóhetste tsi niió:re wa'thontohtáhrho. Kiokierénhton iohseratákie ne tehontohtáhrho iokwèn:rare King's Marina tahontáhsawen tsi niió:re ne Adam's Marina. Tsióhsera tsi náhe iahonnóhetste wahatí:ren ne St. Regis Kaniataratákie tánon ón:wa iohserá:te iahontahsónteren tsi niió:re ne Ahnawá:te Kaniataratákie.

Rontahshnié:nons sha'té:kon niiohwistá:'e iahón:newe, wahontatshennarónnion thó:ne ó:nen tahontáhsawen wahotiió'ten rononhá:'ak oná:ke tánon tsionkwè:ta iontíta's ne oná:ke tóka ó:ni skanèn:ra ne io'kerá:ne kahonwé:ia, ionhriohkawine'táhkhwa kahonwé:ia tánon kakarenia'táhkhwa kahonwé:ia. Rontahshnié:nons wa'thontohtáhrho tsi niió:re ne énkie tánon oh nà:ken ón:ton wa'thontskà:nhon teiohseriiè:tonte wahonwatí:nonte Ohstonhró:non Legion Post 1479 Auxiliary.

Í:iah eh tehshá:ti tehshonatahshnié:non kí:ken iohseratákie, iowe'towá:nen ne watstáhshion wahonó:ko ne Tsi Kaniatarowanén:ne, St. Regis Tsi Kaniataratákie tánon Ahnawá:te Kaniataratákie shé:kon ionehrákwa. Kwáh aiakonehrá:ko tsi niiowe'towá:ne ne watstáhshion tho karákie kwáh iekaia'taié:ri tekaristahróhon, katorákie ne tekakahkwèn:take, ne 1951 niiohseró:ten kà:sere, tóhkara ní:kon ne iononhwataríhen ka'náhkwa tánon kénie ieráhkhwa, okahkwen'ta'shón:'a tánon iekaia'taié:ri ienonhsarókstha sahonnó:ko tewen'niáwe nikatshè:take tho karákie ken'niiorihwá:sas aonkesénhake watst'ahshion kana'tsiakè:ron iaónkion. Ókia'kse ne iótkens wahatitshén:ri ne 2018 kakwitè:ne sha'kaná:to'ne aó:wen, né:k tsi í:iah eh teió:re tsi ronnéhrehkwe, né:'k ne iekaia'taié:ri ontenonhsarókstha wahonó:ko.

Thikarì:wate wahonte'nién:ten ne 2018 Kaniatarowá:nen Wa'thontohtáhrho, tehniiáhsen kwáh rotiren'há:'on iathón:ros ne tsi kana'tsheratákie tsi na'tekiatenontátere nithoné:non: Patricia O'Hara tánon Andy Buist. Khia'teiohserá:ke iatahshnié:nons nó:ne kaniatará:ke tehontohtáhrhos Ka'taróhkwi tsi niió:re ne Tsiaontarí:kon. O'Hara tánon Buist wahnitshén:ri teka'seréhtake ne Tsisnaihne nón:we kaniataratákie - 1951 tánon 1957. Ne wá:iatste ne kanonwakónhshon iontakia'taráhkhwa karáhstha tánon awèn:ke Ionte'nientenhstáhkhwa iontstha'shón:'a wahnikwé:ni wahiatkáhtho tsi nahò:tenk tká:ien, wahnihwánerenke tánon raoná:wen tehotiienawá:kon raotinèn:ra tahontihéntho tsi nahò:ten tká:ien wahonnó:ko. Aiá:wens sénha ronakiohkowá:nen ne ronthón:ros ahonwanakia'táhrhahse tsióhsera niió:re tenhshontohtáhrho.

Jay Wilkins, Tony David tánon Tsiorasa Barreiro wa'thontohtáhrho ne St. Regis Kaniataratákie.

Ne áhsen nikaniatará:ke ne Ahkwesáhshne, ne Kaniatarowanén:ne, St. Regis tánon Ahnawá:te Kaniataratákie, tkontká:was ne ohné:kanos ratihnekíhrha tewen'niawe'ékhon ne onkwehshón:'a tánon tho nón:we nikontinakerénion ionakiohkowá:nen katshé:nen tánon na'teiotikióhkwake ne o'onwara'shón:'a. Né:'k tsi, watstáhshion tánon kahehtkénhtha, kio'serennénhtha ne kaniatarà:ke aota'karitéhtshera aonten'nikonhráhtshera tánon tsi niióhskats. Í:'i ionkwarì:waien ken'niaetewá:iere aioniánereke tsi nén:we takanakerahtsheratákie.

Í:kare ne Ahkwesáhshne Kaniatarà:ke Thontohtáhrhos, ne St. Ró:ren Kaniatarà:ke Kanónhsote iatiià:tare ne kióhton ní:kon wahonterihwahténkia'te wahontahshnié:non wa'thontohtáhrho tsióhsera tsi náhe. Wahonnó:ko ne kaniatarà:ke tewáhsen tons ne watstáhshion ne 2017.

Ne Kaniatarowá:nen Wa'thontohtáhrho tehotiienawá:kon ne Kanien'kéha Ratitsiénhaiens ne Ahkwesáhshne, ne St. Ró:ren Kaniá:tara Kanónhsote tánon ne St. Regis Kanien'kéha ONkwehón:we.

 

Reader Comments
(0)

 
 

Powered by ROAR Online Publication Software from Lions Light Corporation
© Copyright 2018

Rendered 01/07/2019 23:03