Indian Time - A Voice from the Eastern Door

Iakoterihwahtenkià:ton Wa'hèn:ron 16th Ratirista'kehró:non Ronaten'nikonhró:ri Wahotiianeráshsten Aronhiáken Tsi Í:iah Éh Tehá:ti Tehotikie'tóhten

 

Aonhá:'a Rarista'kehró:non Devis Caceres ne Ratirista'kehró:non Local 580, Kanón:no ratiia'tarónnion skáthne ne J.P. Vallejo, Kevin Molina, Lucas Caceres tánon Kenneth Vallejo.

Rahiá:tons: Andy Gardner

Ratirista'kehró:non Raotikióhkwa akté:shon nón:we nithonenónhseron Othorè:ke nà:kon nonkwá:ti ne Oshstoronon'kéhshon tánon Koráhne nonkwá:ti wahonkia'tarò:roke ne 16th Ratirista'kehró:non Ronten'nikonhró:ris. Io'tarihénhne, iorahkó:tahkwe tánon iaó:tehkwe Ohiarihkó:wa 21 shiská:rahkwe ne Ahkwesáhshne Tsi Tehatihwistaientáhkhwa Tkanónhsote.

Kí:ken iohseratákie kwáh aonhá:'a rarista'kehró:non wahonwahsennakará:tate ne Devis Caceres ne Local 580, Kanón:no thaià:tare. Ne aonhá:'a thoteríshen katshè:ta Al Stanley wahaié:na ne Local 12, Skanéhtati nithawé:non. Local 440 roteríshen Bill Cook, wahshakoié:nawa'se ahontenenhrón:ni kí:ken iohseratákie, wahèn:ron í:iah eh teshá:ti tehonakióhkwa tehonakià:taren tsi niiohtón:ne ne tóhkara niiohserá:ke tsi náhe. Sótsi iá:ken thiká:te ákte nón:we nia'té:kon ioterihwahtenkia'tón:ne ontehnhotón:ko ne

Ogdensburg Seaway Ronten'nikonhroria'táhkhwa, ne Colton Akenhnhà:ke ronten'nikonhroria'táhkhwa, ne Hammond Scottish Ronten'nikonhró:ris tánon Maplestock ne Waddington nón:we.

Cook tánon ne thihatiià:tate rontahshnié:nons wahonwahsharáhkhwa ne Wíshe Swamp, ó:ni ne Local 440 roteríshen tsi niká:ien ne kwáh ken'niiohserá:ke raónha ohén:ton rá:tahkwe ne Ratirista'kehró:non Ronten'nikonhroria'táhkhwa. "Í:iah eh teshonakiohkowá:nen teshatiia'tá:ron tsi niiohtón:ne ne tóhkara niiohserá:ke tsi náhe, í:iah ó:ni eh tehshonakiohkowá:nen teshonterò:roks. Né:'k tsi wa'onkwaianeráhsten tsi niió:re ieió:ken" wahèn:ron ne Cook ohén:ton tehotiienawá:kon shakorihonnién:ni.

Wahèn:ron ientsióhserate tehotonhontsió:ni ahate'nién:ten sénha ronakiohkowá:nen ne tehotiienawá:kon enhonkià:taren. Aronhákien tsi ken'nihatí:'a rón:neskwe, Cook wahatsennón:ni tsi wenhniseriióhne. Wa'onkwatera'shwí:ioste tsi wa'onkwenhniseriióhsten. Í:iah nonwén:ton té:keiahre ne aionkwakennóron" wahèn:ron. Tsi ionten'nikonhroria'táhkhwa capstone aó:wen, wahatiráthen (column climb) wahontkáhtho kwáh ken'nihá:ti ne raotikióhkwa raononkwe'ta'shón:'a wahatiráthen ne 30 niwahsì:take kanawa'áhtote wáhontste ne ratihsnonhsà:ke tánon ronhsi'tà:ke. Tom Bannister ronwá:ia'ts, tsi niká:ien rotkwénion tsióhsera tsi náhe, waharáthen 6.47 ia'tetsiohseriiè:tonte. Local 6 raià:tare Dosyowëh (Buffalo) nón:we raononkwè:ta. Tekeníhaton Caceres wahatkwé:ni 10.37 nikahseriiè:take niiohwistá:'e tánon ne ahsénhaton Steve Barnes wahatkwé:ni ne Local 765 Kanà:tsio thaià:tare. Carly Gibbard ne Local 580 kiokierenhtáhkwen iakón:kwe ne wísk niiohserá:ke wa'onte'nién:ten aieráthen ne kanawa'áhtote, né:'k tsi í:iah teiakokwénion aiakoráthen tsi niió:re ne é:neken, tánon wa'tehshakotinòn:waron tánon wa'tehshakotinonhwará:ton ne skáthne rotiiio'ténion ratirista'kehró:non nó:nen saión:we ne ohontsià:ke. Nó:nen iahotiristonkiéhseron ne ronakia'tarónnion iahotiristonkiéhseron ákte nonkwá:ti thatiià:tare.

Wahonte'nién:ten aontahatiié:na karístatsi ionnià:ton iotshe'tahio'thí:ie wáhontste. Skanèn:ra Jeff Laxton tánon Caceres kiokierénton wahiatkwé:ni. Bill Ferrero tánon Dennis Milton ne Local 580 tekeníhaton wahiatkwé:ni tánon Jerome Cerverizzo ahsénhaton wahatkwé:ni.

Tsi wa'thatitsihkwarontónnion karahkwaka'aión:tha wa'thontkén:ni ónhka aonhá:'a eniekwé:ni ken'nikarihwésha teietsihkwarón:ten one'konhrehstha'kó:wa enwateniión:ten.

Al Stanley ne Ratirista'kehró:non Local 12, Skahnéhtati,wahatkwé:ni Aonhá:'a Roteríshen.

Milton wahatkwé:ni. Caceres tekeníhaton wahatkwé:ni tánon Stanley ahsénhaton iahatkwé:ni Ne ieiakokiéhtha, ratiia'tarónnion wahonte'nién:ten iahoná:ti tsi ní:kon enhatikwé:ni kaiá:rakon ne wísk tóka ó:ni ià:ia'k niionhkará:ke na'tewatakà:ron iohrèn:ton tóka nón:wa ne 10 tóka ó:ni 12 niwahsì:take é:neken ne kahentà:ke. Áhsen nihá:ti wa'thatihnió:ten ne kiokierenhtáhkwen -- Paul Jacobs, Lakota Crouse tánon Cerverizzo. Tsi karistatákie wahonthahíta wahonte'nién:tenhste tsi nikarì:wes tsi nón:we ne tehonré:rons wa'thonráhtate ken'na'tewatakahrón:'a tekaristà:ronhwe tánon kakwatákwen karístatsi ionnià:ton tsieiótte kaié:ri nikaronwará:ke ioienawá:kon. Caceres kiokierénhton wahatkwé:ni. Bannister tekeníhaton tánon Paul Jacobs ahsénhaton. Né:'e ne ieiakokiéhtha, ratiia'tarónnion ienhoná:ti wísk ní:kon ne anihsnonwatá:se, iohio'thí:ie ská:ti nonkwá:ti tsieióttte tánon enhonte'shenní:iohste ienhatikahró:ka'te. Laxton wahatkwé:ni, Stanley tekeníhaton tánon Frank Laughing ne Local 440 ahsénhaton.

Oh na'kénhkha wa'thontkén:ni tehatirironwarahontéhrha karahkwa'ka'aión:tha wa'thonré:ron shi ónhka eniekwé:ni é:so eniehwánerenke. Bannister kiokierénhton wahatkwé:ni. Tekeníhaton Stanley tánon Dave Rourke wa'thnihniò:ten. Johnny Skidders kiokierénhton wahatkwé:ni ne ónhka aonhá:'a é:so wahá:iake ne onon'onserakáhte. Sue Rourke wa'ontkwé:ni ne ratinonotsheronniánions. Atomic Place wahonwatiia'tará:ko ne kítkit onerahóntsha wahatírihte.

 

Reader Comments
(0)

 
 

Powered by ROAR Online Publication Software from Lions Light Corporation
© Copyright 2018