Ienhatihahahserón:ni Otskwa'rhéhne Iohatákie Tánon Tarbell Iohatákie
AHKWESÁHSHNE - Ne Ohstoronòn:ke Nonkwá:ti Ratitsiénhaiens ronatshennón:ni tsi enthatirihó:wanahte tsi onthwistatáhko enwá:ton teioháhake enhshotinehtarón:ti kí:ken wakenhnhatákie. $280,000 sahotihwistaién:ta'ne ne aonsahahatikwatá:ko Otskwa'rhéhne Iohatákie tánon Tarbell tsi Iohatákie, teiohserá:ke wahatíhente tsi náhe tkarihwahserón:ni.
"Ne SRMT Oháha Tsi Nahò:ten Ratíhsere tehotiweienhnhará:'on iehatihahahsonterónnions Business Park Oháha enhsathahó:ko ne Iohatákie 37 tánon ohén:ton rón:ne tsi rotikwatakwenhákie tsi nón:we na'teiotonhontsióhon ne tiká:te iohahatákie ne tsi Kanenhstá:ton, wahathró:ri ne Ohén:ton Í:rate, Raotinékeri ne Ratihahakwatákwas, Brent Herne. Herne iahasónteron, wahathró:ri, "Otskwa'rhéhne tsi Iohatákie tánon Tarbell Iohatákie ohén:ton thonathró:ri tsi ne teioháhakie kwáh teiotonhontsióhon aonsakahahkwatákwen." Ne Ohiarihkó:wa 10, 2018 wahotiió'ten tánon wahahtihakwaríhsi tahontáhsawen ohén:ton tsi niió:re 1.5 niionhkará:ke tahati'nehtará:ren ne 2.2 niioháhes ne Otskwa'rhéhne Iohatákie. Nó:nen enhatíhsa, ne roti'nehtarónkies, thó:ne ó:nen ienhontahsónteren ákte nón:we enhshatikwatá:ko ne 1.6 niioháhes ne Tarbell Iohatákie. Tetsiá:ron kí:ken iohatákie tóka nón:wa ne teiohiakserá:ke nikarì:wes enhatihahísa.
Né:'e ne Onkwehón:we Ohaha'kéhshon Ratihahahserón:ni Tsi Nihatiierá:ne (Tribal Transportation Improvement Plan) wahonwatihró:ri ne kanenhrá:ke tsióhsera tsi náhe, ne Tarbell Iohatákie tsík 2020 teiotonhontsióhon akakwatákwen ok ne Otskwa'rhéhne Iohatákie teiotonhontsiohón:ne tsík 2019 tánon 2020 akakwatákwen. Né:'e tsi sótsi wa'kahoháksen'ne tánon ronakiohkowá:nen ne onkwehón:we wahatiri'wanón:ton ne akakwatákwen. Ne SRMT Ohstoronòn:ke nonkwá:ti ia'thotirihwaién:ta'se ón:wa wakenhnhá:te aonsakahaseronníhake aronhiákien tsi kwáh teiotonhontsióhon akahahahseronníhake tewanákere ó:nenk tsi kwáh ken nikarì:wes enwatehrhará:ton aonthwistatáhko tsi niió:re ienskahrhóntera'ne tsi nahò:ten ronathró:ri teiotonhontsióhon. Kahwístaien ne $280,000 tahónhtka'we ne Tribal General Fund tánon Capital Projects Investment Fund (Ronathwistatoweièn:ton) ahatihahahserón:ni tánon aonsaiohahiióhake ne tahontstikáhwha ne onkwehshón:'a ne Otskwa'rhéhne Iohatákie tánon Tarbell Iohatákie. Kí:ken enhskakwatákwen enhskahahiióhake tahontstikáhwha ne rotihonwi'serenónkies tánon ronathahitáhkhe tsi niió:re ne enwatahsón:terake enhatihahahseronniánion aoio'ténhsera enhskarihwaseronníhake ne Tribal Transportation Improvement (Onkwehón:we Ratihahahserón:ni Tsi Nihatiierá:ne) enhotiió'ten.
Tsi rotihonwi'serónkies entsiehtsiiehiahráhkwen sewaten'nikòn:raren nó:nen enhnón:we sewahonwi'serónkie tsi nón:we nihatihahaserón:ni. Tasewa'serón:nent skenenhákie. Skenen'shón:'a nó:nen eh nón:we sewahonwí:sere tsewatohetstonhákie.
Reader Comments(0)